Դե, ինչպես ասում է Կարլսոնը` «Շարունակում ենք զրույցը», ահա և անձեռոցիկների ձևավորման խոստացված 2-րդ մասը: Դուք էլ շարունակեք փորձել, վարպետանալ, հիացնել:

Տիբեթյան հովհար

1. Անձեռոցիկը դրեք հակառակ կողմով դեպի ներքև: Վերևի մոտավորապես ¼ ծալեք դեպի ներքև:

2. Շրջեք անձեռոցիկը: Ներքևի մոտավորապես 1/3 ծալեք դեպի վերև:

3. Անձեռոցիկը կեսից ծալեք դեպի վեր:

4. Ստացված պատկերը հովհարի նման ծալեք այնպես, որ ստացվի 5 հավասար շերտ:

5. Ձեռքի մեջ սեղմելով բաց կողմը, ավելի ներս ընկած ծալքերը դուրս քաշեք հակառակ ուղղություններով և ֆիքսեք:

6. Բացեք «հովհարը»:

Էլեգանտ պայուսակ "Haute couture”

1. Անձեռոցիկը ուղղահայաց կեսից ծալեք (ծալը դեպի աջ):

2. Նորից կեսից ծալեք ներքևից վերև:

3. Վերին ձախ անկյան երկու շերտերն էլ ծալեք դեպի կենտրոն:

4. Դեպի կենտրոն ծալեք նաև վերևի աջ անկյունը:

5. Ստացված եռանկյունը ծալեք դեպի ներքև կենտրոնից մի քիչ ավելի ցած գծով:

6. Վերևի ձախ և աջ անկյունները ծալեք դեպի կենտրոն:

7. Ստացված եռանկյունը ծալեք դեպի ներքև ներքևի եռանկյան վրա:

Օղակով հովհար

1. Անձեռոցիկը դրեք երեսի կողմով դեպի ներքև:

2. Հովհարաձև ծալեք անձեռոցիկը:

3. Մեջտեղից ծալեք:

4. Օղակը հագցրեք անձեռոցիկին և բացեք «հովհարը» կամ տակը պտտեք ու դրեք բարձր ոտիկով բաժակի մեջ: